Гэты дзень дае магчымасць нагадаць сабе, што правы чалавека ўніверсальныя, непадзельныя, неад'емныя, узаемазалежныя і ўзаемазвязаныя. Іх прасоўванне і абарона абавязковыя для абароны чалавечай годнасці, а сапраўднае захаванне і рэалізацыя правоў чалавека неабходны для міру, дэмакратыі і ўстойлівага развіцця.

У гэтым годзе мы сталі сведкамі асабліва сур'ёзных замахаў на правы чалавека, якія носяць масавы характар, – ад незаконнай, несправакаванай і неапраўданай агрэсіўнай вайны Расіі супраць Украіны, якая прынесла і працягвае прыносіць людзям неймаверныя пакуты, да цяжкіх парушэнняў і невыканання правоў чалавека ў Афганістане, Беларусі, Эфіопіі і М'янме (Бірме). ЕС таксама выказвае глыбокую занепакоенасць у сувязі з яшчэ большым пагаршэннем становішча з правамі чалавека ў Расіі і звяртае ўвагу на пагаршэнне сітуацыі з правамі чалавека ў Кітаі і выпадкі гвалтоўнага падаўлення мірных пратэстаў у Іране. У многіх краінах рэпрэсіі і абмежавальныя меры асабліва закранулі жанчын і дзяўчынак, якія больш за іншыя групы насельніцтва пакутуюць ад парушэнняў правоў чалавека ва ўмовах канфліктаў. У сур'ёзнай небяспецы свабода сходаў, свабода слова ў інтэрнэце і ў жыцці і свабода СМІ. Гэта дапаўняе ўсё большы спіс парушэнняў па ўсім свеце, якія застаюцца ў цэнтры нашай увагі.

ЕС будзе і надалей адсочваць выпадкі парушэння правоў чалавека, прыцягваць увагу да іх і рабіць рашучыя дзеянні на міжнародных пляцоўках для барацьбы з імі, а таксама падтрымліваць міжнародныя ініцыятывы для прыцягнення ўсіх вінаватых да адказнасці.

У адпаведнасці з Планам дзеянняў у галіне правоў чалавека і дэмакратыі на 2020-2024 гады ЕС задзейнічае шырокі інструментарый для падтрымкі і прасоўвання правоў чалавека ва ўсім свеце. Сярод даступных яму механізмаў — двухбаковае і шматбаковае супрацоўніцтва ў галіне правоў чалавека, санкцыі ў дачыненні да фізічных і юрыдычных асоб, якія маюць дачыненне да сур'ёзных парушэнняў правоў чалавека, а таксама праграмна-праектныя меры падтрымкі ў рамках Тэматычнай праграмы па пытаннях правоў чалавека і дэмакратыі на 2021—2027 гады.

ЕС стаіць на баку праваабаронцаў і грамадскіх арганізацый ва ўсім свеце і аказвае ім падтрымку. У гэтым ключы 24-ы Форум па правах чалавека ЕС-НДА, які пройдзе сёлета, зноў паслужыць пляцоўкай для ўзаемадзеяння з праваабаронцамі з розных краін. Мы абмяркуем магчымасці і перадавыя метады для барацьбы з беспакаранасцю і для забеспячэння доступу да правасуддзя і прыцягнення вінаватых да адказнасці за парушэнне правоў чалавека.

У Дзень правоў чалавека мы абавязваемся падвоіць свае намаганні, каб падтрымліваць і адстойваць інтарэсы людзей, якія падвяргаюцца прыгнёту і пагрозам, дзе б яны ні жылі.