Мы адзінадушна асуджаем сфальсіфікаваныя прэзідэнцкія выбары ў Беларусі 26 студзеня і парушэнні правоў чалавека, які працягвае здзяйсняць рэжым у Беларусі. Нядаўна абвешчаныя санкцыі ўяўляюць сабой скаардынаванае шматбаковае намаганне прыцягнуць рэжым Лукашэнкі да адказнасці.

Ніякія выбары не могуць лічыцца свабоднымі, справядлівымі або адпаведнымі міжнародным стандартам, калі яны праводзяцца ва ўмовах працяглых рэпрэсій, прыгнёту грамадзянскай супольнасці, адвольных затрыманняў і абмежаванняў на сапраўдны ўдзел у палітычным жыцці. Рашэнне рэжыму запрасіць Бюро па дэмакратычных інстытутах і правах чалавека Арганізацыі па бяспецы і супрацоўніцтве ў Еўропе для назірання ўсяго за 10 дзён да выбараў не дазволіла БДІПЧ атрымаць доступ да ключавых этапаў выбарчага працэсу. Гэтыя дзеянні супярэчаць міжнародным абавязацельствам Беларусі і дэманструюць відавочнае жаданне пазбегнуць празрыстасці выбарчага працэсу.

Мы асуджаем жахлівыя парушэнні правоў чалавека, якія працягвае здзяйсняць рэжым Лукашэнкі, і заклікаем вызваліць больш за 1250 палітычных вязняў, якіх па-ранейшаму несправядліва ўтрымліваюць у няволі. Мы заклікаем Беларусь прытрымлівацца сваіх міжнародных абавязацельстваў у галіне правоў чалавека і ў рамках АБСЕ ва ўсіх адносінах, у тым ліку аднавіць адкрытую грамадзянскую супольнасць, каб стварыць умовы для правядзення новых выбараў у адпаведнасці з міжнароднымі стандартамі. Мы на баку народа Беларусі і прызнаем яго права вызначаць уласную будучыню па-сапраўднаму свабодна і справядліва, без страху, прыгнёту ці знешняга ўмяшання.

Мы працягнем падтрымліваць імкненні беларускага народа да свабоднай, дэмакратычнай і незалежнай Беларусі.