У святле таго, што Расія працягвае весці агрэсіўную вайну супраць Украіны, а Беларусь у гэтым падтрымлівае Расію, і ў сувязі з паведамленнямі аб зверствах, учыненых расійскімі ўзброенымі сіламі ва Украіне, Савет сёння прыняў рашэнне аб увядзенні шостага пакета эканамічных і індывідуальных санкцый, накіраваных супраць Расіі і Беларусі.

«З дапамогай прынятага сёння пакета санкцый, які ўключае дадатковыя эканамічныя меры, мы яшчэ больш абмяжоўваем здольнасць Крамля фінансаваць вайну. Мы забараняем імпарт расейскай нафты ў ЕС і тым самым пазбаўляем Расію велізарнай крыніцы прыбыткаў. Мы адключаем яшчэ некалькі ключавых расейскіх банкаў ад міжнароднай плацежнай сістэмы SWIFT. Мы таксама ўводзім санкцыі супраць тых, хто нясе адказнасць за зверствы, учыненыя ў Бучы і Марыупалі, і забараняем вяшчанне яшчэ некалькіх распаўсюджвальнікаў дэзінфармацыі, якія актыўна садзейнічаюць ваеннай прапагандзе прэзідэнта Пуціна», – заявіў Жазэп Барэль, Высокі прадстаўнік ЕС па замежных справах і палітыцы бяспекі.

Узгоднены пакет уключае шэраг мер, закліканых пазбавіць Расію магчымасцяў працягваць агрэсію.

Нафта

ЕС прыняў рашэнне забараніць пакупку, імпарт і транспарціроўку сырой нафты і некаторых відаў нафтапрадуктаў з Расіі ў Еўрапейскі саюз. Паэтапная адмова ад расейскай нафты зойме ад 6 месяцаў для сырой нафты да 8 месяцаў для іншых ачышчаных нафтапрадуктаў.

Прадугледжана часовае выключэнне для імпарту сырой нафты па нафтаправодзе ў тыя краіны-члены ЕС, якія з-за свайго геаграфічнага становішча асабліва залежаць ад расійскіх паставак і ў якіх няма рэальных альтэрнатыўных варыянтаў.

Акрамя таго, часовае выключэнне будзе зроблена для Балгарыі і Харватыі па пытанні імпарту расійскай сырой нафты марскім шляхам і вакуумнага газойлю адпаведна.

Адключэнне ад сістэмы SWIFT яшчэ трох расійскіх банкаў і аднаго беларускага банка

ЕС распаўсюджвае ўжо існуючую забарону на прадастаўленне спецыялізаваных паслуг па абмене фінансавымі паведамленнямі (SWIFT) яшчэ на тры расійскія крэдытныя арганізацыі: найбуйнейшы расійскі банк Ашчадбанк, Маскоўскі Крэдытны Банк і Рассельгасбанк і Беларускі банк развіцця і рэканструкцыі "Белінвестбанк".

Вяшчанне

Еўрапейскі саюз прыпыняе вяшчанне на тэрыторыі ЕС яшчэ трох расійскіх дзяржаўных тэлеканалаў: "Расія РТР" / "РТР Планета", "Расія 24" і "ТВ Цэнтр-International". Расейскі ўрад выкарыстоўвае гэтыя структуры як інструмент маніпулявання інфармацыяй і распаўсюджвання дэзінфармацыі аб уварванні ва Украіну, уключаючы прапаганду, з мэтай дэстабілізацыі сітуацыі ў суседніх з Расіяй дзяржавах, а таксама ў ЕС і яго краінах-членах. У адпаведнасці з Хартыяй аб асноўных правах, гэтыя меры не перашкодзяць гэтым СМІ і іх супрацоўнікам ажыццяўляць у ЕС дзейнасць, адрозную ад вяшчання, напрыклад, пошук інфармацыі і правядзенне інтэрв'ю.

Экспартныя абмежаванні

ЕС пашырае спіс фізічных і юрыдычных асоб, якіх закрануць абмежаванні на экспарт тавараў і тэхналогій двайнога прызначэння. У гэты спіс увойдуць як расейскія, так і беларускія кампаніі. Акрамя таго, ЕС пашырыць спіс тавараў і тэхналогій, якія, як мяркуецца, могуць садзейнічаць тэхналагічнаму развіццю расійскага сектара абароны і бяспекі. У яго будуць уключаны 80 хімічных рэчываў, якія могуць быць выкарыстаны для вытворчасці хімічнай зброі.

Кансалтынгавыя паслугі

ЕС забароніць прадастаўляць Расіі бухгалтарскія паслугі, паслугі ў сферы сувязей з грамадскасцю і кансалтынгу, а таксама паслугі "воблачных сервісаў".

Індывідуальныя спісы

Акрамя таго, Савет вырашыў увесці дадатковыя санкцыі супраць фізічных і юрыдычных асоб: супраць тых, хто нясе адказнасць за зверствы, учыненыя расійскімі войскамі ў Бучы і Марыупалі, супраць асоб, якія падтрымліваюць вайну, буйных бізнесменаў і членаў сем'яў алігархаў і крамлёўскіх чыноўнікаў, ужо ўключаных у санкцыйны спіс, а таксама супраць кампаній абароннага комплексу і фінансавай арганізацыі.

ЕС рашуча асуджае агрэсіўную вайну Расіі супраць Украіны. Ён заклікае Расію неадкладна спыніць безразборлівыя атакі на мірных жыхароў і грамадзянскую інфраструктуру, а таксама неадкладна і безумоўна вывесці ўсе свае войскі і ваенную тэхніку з усёй тэрыторыі Украіны ў межах яе міжнародна прызнаных межаў. Немагчыма апісаць словамі тыя зверствы, якія здзяйсняюць расейскія войскі, і пакуты і разбурэнні, якія яны нясуць за сабой. ЕС заклікае Расію неадкладна даць гуманітарны доступ і забяспечыць бяспечны калідор для ўсіх грамадзянскіх асоб. Ён таксама заклікае Расію неадкладна прадаставіць украінскім грамадзянам, гвалтоўна вывезеным у Расію, магчымасць без рызыкі для жыцця вярнуцца дадому.

ЕС застаецца верным узятаму на сябе абавязацельству дапамагчы Украіне ў рэалізацыі яе неад'емнага права абараняць сябе ў барацьбе з расійскай агрэсіяй і будаваць мірную, дэмакратычную і квітнеючую будучыню.

Адпаведныя прававыя акты неўзабаве будуць апублікаваны ў Афіцыйным часопісе.