2024 оны 9 дүгээр сарын 18-ны өдөр Европын Холбооноос Монгол Улсад суух Онц бөгөөд Бүрэн эрхт Элчин сайд хатагтай Ина Марчюлёните Монгол Улсын Ерөнхийлөгч эрхэмсэг ноён Ухнаагийн Хүрэлсүхэд итгэмжлэх жуух бичгээ өргөн барилаа. 

Европын Холбоо бол Монгол Улсын хувьд чухал түнш бөгөөд гуравдагч хөрш юм гэдгийг Монгол Улсын Ерөнхийлөгч тэмдэглэн, ардчилал, зах зээлийн эдийн засагт шилжих үеэс эхлэн байнга дэмжиж ирсэнд мөн талархал илэрхийллээ. Тэрээр мөн энэ онд хоёр тал дипломат харилцаа тогтоосны 35 жилийн ой тохиож буйг онцолж, Европын Холбоотой цаашид ногоон хөгжил, байгаль хамгаалал, уур амьсгалын өөрчлөлтийн эсрэг үр дүнтэй тэмцэх, цахим шилжилт болон харилцаа холбоог хөгжүүлэх чиглэлд хамтын ажиллагаагаа өргөжүүлэх хүсэлтэй байгаагаа хэллээ. 

Эдийн засгийг төрөлжүүлэх, уур амьсгалын өөрчлөлтийн эсрэг үр дүнтэй тэмцэх Монгол Улсын хүчин чармайлтыг үргэлжлүүлэн дэмжихэд бэлэн байгаагаа Элчин сайд Ина Марчюлёните илэрхийлээд, ногоон хөгжил, ардчилал болон хууль дээдлэх ёсыг дэмжихээ хэллээ. 

President's office Mongolia