Akranes

Fyrsta stopp Evrópurútunnar var á Akranesi þar sem haldinn var kynningarfundur í glæsilegri nýsköpunarmiðstöð bæjarins sem ber heitið Breið - Þróunarfélag. Sendiherra fundaði með formanni bæjarráðs Akranesbæjar, Valgarði Lyngdal Jónssyni, sem upplýsti sendiherra um þátttöku stofnana sveitarfélagsins í samstarfsáætlunum ESB líkt og Erasmus+. Einnig ræddu þau uppbyggingu sveitarfélagsins, íbúaþróun, og margt fleira.

Á Akranesi hefur ESB varið yfir 400 milljónum króna í evrópsk samstarfsverkefni frá árinu 2000. Fjármagn þetta hefur runnið til leikskóla, grunnskóla, og háskóla á svæðinu, sem og til nýsköpunarverkefna, rannsókna o.fl.

Evrópurútan kom við á Blönduósi þar sem haldin var kynning á Evrópustyrkjum í félagsheimilinu. Sveitarstjóri Húnabyggðar, Pétur Bergþór Arason, tók vel á móti sendiherranum í ráðhúsi Blönduósar og hélt sveitarstjórinn kynningu á sveitarfélaginu, stefnum sveitarstjórnar, og tækifærum til uppbyggingar á iðnaði og þjónustu á svæðinu. Sendiherra fór einnig í heimsókn til Textílmiðstöðvar Íslands, Þekkingarsetursins á Blönduósi . Þar fékk sendiherra kynningu á glæsilegum listaverkum og spjallaði við erlent og íslenskt listafólk sem hefur tímabundna aðstöðu þar til þess að skapa. Auk þess gafst sendiherra tækifæri til þess að skoða tilraunastofu textílmiðstöðvarinnar sem og að sauma í teppi sem hefur verið 13 ár í vinnslu og segir sögu Vatnsdælinga.

Þriðja stopp Evrópurútunnar var á Sauðárkróki, þar bauð Rannís íbúum á súpufund á Kaffi Krók um Evrópustyrki.

Sendiherra ESB heimsótti Byggðastofnun þar sem sendiherra hlaut kynningu á mikilvægum verkefnum stofnunarinnar í þágu byggðaþróunar og samfélagseflingar um land allt.

Fjórða stopp Evrópurútunnar var á Akureyri. Þar var haldinn kynningarfundur um Evrópustyrki í glæsilegu húsi Menningarfélags Akureyrar, Hofinu.

Sendiherra heimsótti einnig Háskólann á Akureyri og ræddi þar við Áslaugu Ásgeirsdóttur, rektor, og starfsfólk.

Evrópurútan hélt þaðan ferð sinni áfram um landið án Sendinefndar ESB.

Sendiherra ESB tók einnig þátt í heimsókn Evrópurútunnar til Reykjanesbæjar þar sem kynningarfundur var haldinn í Fjörheimum, félagsheimili.

Forseti bæjarstjórnar Reykjanesbæjar, Guðný Birna Guðmundsdóttir, tók vel á móti sendiherranum og Samuel Ulfgard, varasendiherra, í ráðhúsinu ásamt Halldóri Karli Hermannssyni, hafnarstjóra. Á fundinum ræddu þau uppbyggingarmál og íbúaþróun bæjarins, eldgosin á Reykjanesskaga og áhrif þeirra á Grindavík, þátttöku stofnana sveitarfélagsins í evrópskum samstarfsverkefnum og hafnarmál.